Në Komunën e Gjilanit, organizuar nga Drejtoria Komunale e Arsimit dhe nga mësimdhënësit e matematikës nga shkollat e mesme është organizuar olimpiada në matematikë tashmë një një garë tradicionale në matjen, vlerësimin dhe përgatitjen e kuadrove të reja në këtë fushë të rëndësishme të shkencave.
Në hapjen solemne të olimpiadës “Gjilani 2017”, drejtoresha e Arsimit, Shqipe Kastrati-Haziri, ka thënë se sukseset e nxënësve dhe përkushtimi që ekziston tek mësimdhënësit është një shtytës kryesor që DKA të mbështet dhe përkrahë ide dhe iniciativa të tilla me rëndësi në synimet e zhvillimit të shkencës.
Më tej Kastrati-Haziri, ka thënë se Gjilani është një Komunë e cila për disa vite me radhë shquhet për rezultate të nxënësve jo vetëm në nivelin republikan, por edhe më gjerë në regjion dhe në nivelet botërore, duke i sjellur Kosovës medalie olipike në rrafshin e dijes.
“Olimpiada Matematike – Gjilani 2017”, është organizim për nxënësit më të dalluar të shkollave të mesme duke përfshirë pjesëmarrës nga klasa IX, X, XI dhe XII ndërsa veçanti e këtij organizimi ishte që këtë vit kjo garë është organizuar në kuadër të 9 vjetorit të shpalljes së pavarësisë së Kosovës.
Në fjalën e tij profesori nga Universiteti “Kadri Zeka”, Xhevdet Thaçi ka çmuar lartë punën që po bëhet konkretisht nga mësimdhënësit e matematikës në mbështetje edhe të drejtorisë komunale të Arsimit dhe me gatishmërinë e talentin që po tregojnë nxënësit në lëndën e matematikës. Ai poashtu ka bartur mesazhin se pa zhvillim dhe kuadro të reja në lëmin e shkencave natyrore, nuk mund të ketë as zhvillim ekonomik, teknologjik, apo zhvillim në fushat tjera.
E nga ana e tij, koordinatori i olimpiadës së matematikës, profesori Festim Shkodra, ka thënë para nxënësve garues se të gjithë ata që janë pjesë e kësaj gare janë fitues në një formë apo tjetër, sepse siç tha ai, për të arritur pjesëmarrjen në një garë domosdoshmërisht ka edhe filtra të tjerë paraprak, që janë mëse të nevojshëm për kapërcimin nga një shkallë në tjetrën. Shkodra ka porositur nxënësit që të punojnë për të marrë sa më shumë dije dhe për punë të vazhdueshme, në mënyrë që rezultatet dhe sukseset e tyre të jenë në nivelin më të lartë shtetror dhe ndërkombëtar.
“Vullneti i madh për punë i mësimdhënësve të matematikës të Komunës së Gjilanit si dhe etja për dije e nxënësve tanë, po bën që Gjilani të shquhet me rezultatet e arritura nga nxënësit përfaqësues të saj në vend e më gjerë. Sepse garat e vazhdueshme që po mbahen, me standarde mjaft të larta, po bëjnë që nxënësit tanë të kaliten në fushën e matematikës gjithnjë e më tepër”, ka thënë mes tjerash koordinatori Shkodra.
Ndryshe, fituesit e viteve paraprake, nga kjo garë, tashmë janë student të dalluar, të punësuar në kompani dhe institucione relevante si brenda ashtu edhe jashtë vendit.
Në këtë olimpiadë, ku morën pjesë nxënësit më të mirë në fushën e matematikës, të klasave IX, X, XI dhe XII nga të gjitha shkollat e Komunës së Gjilanit, 12 më të mirët u shpallën:
KLASA IX
1) BARDH OSMANI – SHMU ,,Musa Zajmi” – Gjilan
2) ANDI SEJDIU – SHMU ,,Sadulla Brestovci” – Gjilan
3) ALTIN URUQI – SHMU ,,Ibrahim Uruqi” – Bresalc
KLASA X
1) LAURORË JAHIU – Gjimnazi Natyror ,,Xhavit Ahmeti” – Gjilan
2) DRILON MORINA – Gjimnazi Natyror ,,Xhavit Ahmeti” – Gjilan
3) RIAR HAZIRI – Gjimnazi Natyror ,,Xhavit Ahmeti” – Gjilan
KLASA XI
1) ENDRIT MUJI– Gjimnazi Natyror ,,Xhavit Ahmeti”- Gjilan
2) LIRAK RUSHITI– Gjimnazi Natyror ,,Xhavit Ahmeti” – Gjilan
3) ERION BAJRAMI– Gjimnazi Natyror ,,Xhavit Ahmeti” – Gjilan
KLASA XII
1) NRIÇIM RRAHMANI– Gjimnazi Natyror ,,Xhavit Ahmeti” – Gjilan
2) MUHAMED ZAHIRI– Gjimnazi Natyror ,,Xhavit Ahmeti” – Gjilan
3) URATA SADIKU– Gjimnazi Natyror ,,Xhavit Ahmeti” – Gjilan
Garuesit dhe profesorët shpresojnë që edhe sivjet, duke u bazuar në punë, matematikanët e rinj gjilanas, të arrijnë të fitojnë në OMK 2017 si dhe të bëhen pjesë e ekipit të Kosovës, që do të marrë pjesë në IMO 2017, në Brazil.
