Klubi Rotarian Gjilani ka dorëzuar sot për Qendrat e Mjekësisë Familjare dhe Spitalin e Gjilanit një kontingjent ndihmash, shtretër dhe pajisje ndriçimi për tavolinën e sallës operative, donacion ky që është siguruar përmes Shoqatës “Busavata” në Zvicër. Në ceremoninë e dorëzim-pranimit të këtij donacioni, ka marrë pjesë edhe kryesuesja e Kuvendit Komunal të Gjilanit, Valentina Bunjaku – Rexhepi, e cila tha se ndihet e lumtur që në emër të Komunës po e pranon këtë donacion që do të shërbejë për QMF-të dhe Spitalin e Gjilanit. Ajo tha se po dëshmohet vazhdimësia e mirë e bashkëpunimit të Komunës me rotarianët e Gjilanit, të cilët edhe më parë sjellë donacione dhe kanë realizuar projekte, duke përmend me këtë rast ndarjen e bursave për studentë.
Bunjaku-Rexhepi premtoi se bashkëpunimi me rotarianët gjilanas do të vazhdoj edhe në të ardhmen, derisa ka falënderuar edhe donatorët tjerë, sepse falë tyre e veçanërisht falë bashkatdhetarëve tanë, Gjilani po ndihmohet dhe Komuna po zhvillohet për të mirë.
Fatos Qerimi, kryetar i Klubit Rotarian Gjilani ka thënë se donacioni përbëhet nga dhjetë shtretër si dhe komplet pajisje ndriçimi për tavolinën operative.
Ai tha se këto ndihma rotarianët i kanë adresuar për nevojat e Qendrave të Mjekësisë Familjare si dhe Spitalin e Gjilanit dhe janë mundësuar falë Shoqatës “Busavata” – Zvicër me humanistin, bashkatdhetarin Asllan Maliqi.
Qerimi tha se sipas donatorit, vlera e këtyre pajisjeve arrin në rreth 80 mijë euro dhe beson se ato do t’iu shërbejnë qytetarëve, përkatësisht pacientëve, ndërkohë që ka falënderuar donatorin, rotarianët, por edhe Komunën e Gjilanit, në krye me Lutfi Hazirin, që ka mbuluar shpenzimet e transportit.
Fejzulla Berisha drejtori Qendrës Kryesore të Mjekësisë Familjare e ka vlerësuar këtë donacion, duke thënë se çdo ndihmë është e mirëseardhur. Ai tha se tani pjesa që është parapara për QMF-të, do të ndahet dhe dërgohet aty ku ka nevojë, derisa pjesa tjetër do të shkojë për nevojat e Spitalit të Gjilanit.
Ai vlerësoi faktin se prej se është drejtor i QKMF-së, ndër donacionet e para kanë qenë pikërisht ato që janë marrë nga RC Gjilani dhe ja, po vazhdon sërish ky bashkëpunim dhe kjo ndihmë nga rotarianët gjilanas për çka iu është mirënjohës.
Dr, Besim Guda, këshilltar i drejtorit të Spitalit të Përgjithshëm, në emër të drejtorit, ka falënderuar rotarianët për këtë ndihmë. Ai tha se është një donacion me një rëndësi të veçantë sepse vije nga njerëzit vullnetmirë.
Donacione të tilla, thotë Guda, ndihmojnë në përmirësimin e kushteve dhe të shërbimeve që ofrohen për qytetarët, për pacientët, nga Spitali i Përgjithshëm i Gjilanit.
