Festivali i dramës shqipe “Talia e Flakës 2025”, në natën e dytë garuese solli në konkurrencë para publikut gjilanas shfaqjen “Stiffler”, prodhim i teatrit alternativ “Integra” nga Prishtina.
Që në hapje të siparit, shikuesit e kufizuar në numër, u ballafaquan me disa ndodhi e ngjarje të befasishme e të përnjëhershme në strukturën e shfaqjes, përfshirë tekstin e autores, çasjen e mbarështrimit skenik nga regjisori, si dhe lojën e aktorëve, të cilët përgjatë rrjedhës së shfaqjes i hasim të transformuar në disa karaktere.
Në një mëngjes të rëndomtë, Hava, një punëtore seksi mbi të 40-at, futet në dhomën e pranimit të emergjencës së spitalit me një thikë të ngulur në shpinë, fatkeqësi që i kishte ndodhur një natë më parë nga një klientë i saj.
Tema e mbarështruar me kryepersonazhe një femër prostitutë që ofron shërbime seksuale, i vë në sprovë të patjetërsueshme shikuesit prezentë për t’i mbajtur të tillë, “të lidhur” emocionalisht me shfaqjen, dhe koshientë për atë që do të pasojë gjatë tërë rrjedhës së saj, nga fillimi deri në fund!
Kjo u pa nga audienca si gjetje atraktive autoriale, sikurse edhe zgjuarësi nga ana e regjisorit, i cili ishte ai që sendërtoi skenikisht një situatë të tillë, e cila situatë do të pasohet më pas duke mbajtur po atë nivel “tensioni” gjatë tërë rrjedhës, ngase deshi apo s’deshi publiku, thika “Stifler” në shpatullën e prostitutës e prodhonte nga aspekti psikologjik një gjendje të tillë emocionale.
E për të shkaktuar tensione akoma më të ndjeshme dramatike, regjisorit Kushtrim Koliqi, nuk i ngutej t’i qartësonte gjërat! Ai, me dorën e tij tashmë të stërvitur regjisoriale, e lë në mëshirë të neglizhencës së stafit pranues brenda ngjarjes në emergjencë të spitalit, fatin e prostitutës me thikë në shpatull, e cila mezi arrinte të merrte frymë! – Përveç kësaj, krahas fatkeqësisë së prostitutës, regjisori përmes lojës së shkëlqyeshme të aktorëve, veçmas nga Rebeka Qena, mjaft sigurtë arriti të paraqesë realitetit tonë të ndjeshëm, gjegjësisht neglizhencës e sistemit të shëndetësisë, të cilën si dukuri e hasim mjaft shpesh në përditshmëri, madje gjithandej në mjekësi, si në pediatri e akusheri ashtu edhe në stomatologji e gjinekologji!
Por regjisori e autorja sikur nuk mjaftohen vetëm me vënien në spikamë të të palarave të sistemit të rënduar shëndetësorë nga ana e ndonjërit nga zyrtarët byrokratë në shfaqje. Ata shkojnë akoma më larg, për të vënë në sprovë edhe kredibilitetin e policisë dhe atë të sistemit të drejtësisë.
Njëkohësisht, ata përçojnë mesazhin e qartë për rrezikun që i kanoset shoqërisë nga neglizhenca institucionale me shumë byrokraci. Fundja, është misioni i teatrit t’i “korrigjojë” veset e shoqërisë përmes formave artistike/skenike, të cilin mision autorët në prapaskenë dhe ekipi në skenë arrijnë ta pasqyrojnë shtruar e qartë para publikut.
Ashtu sikurse pritej, nuk munguan opinionet pozitive për shfaqjen “Stiffler” (“Thika”), sikurse që nuk munguan as opinionet pozitive për nivelin artistik e estetik të shfaqjes.
Mendim të njejtë kishte edhe kritiku, Shemsi Doda, i cili e vlerësoi shfaqjen pozitivisht dhe në funksion të rolit të institucionit të teatrit si mision që ka në shoqëri.
“Teatri ka rol të rëndësishëm në luftimin e dukurive negative në familje e shoqëri, duke shërbyer si një platformë për edukim e reflektim. Si i tillë, teatri mund të ndihmojë në ngritjen e ndërgjegjësimit mbi problemet sociale… Përmes personazheve dhe situatave që reflektojnë realitetin e përditshëm, teatri mund të ilustrojë sfidat dhe problemet që ndodhin brenda familjeve dhe shoqërisë”, tha ai, duke vënë theksin tek nevoja e trajtimit të këtyre temave, pasi si të tilla, sipas tij, ushqejnë dialogun dhe inkurajojnë veprimin, duke kontribuar njëkohësisht në krijimin e një shoqërie më të drejtë e më të vetëdijshme.
Shfaqja “Stiffler” ishte pjesë e programit të natës së dytë të festivalit të dramës “Talia e Flakës”, prodhim i teatrit “Integra” – Prishtinë.
Teksti: Doruntina Basha
Regjia: Kushtrim Koliqi
Assitente: Kreshnike Osmani,
Luajnë: Rebeka Qena Adrian Morina Armend Smajli
Skenografia: Mentor Berisha .
Kostumet: Njomza Luci
Dizajner i dritave: Skender Latifi
Festivali i Dramës “Talia e Flakës 2025” vijon më 24 janar 2025, me shfaqjen e natës së tretë, “13”, nga Teatri “Adriana” nga Ferizaji, me tekst të Sylejman Rushitit.
