
Komuna e Gjilanit ka përgatitur një program të pasur me aktivitete kulturore, artistike dhe përkujtimore për të shënuar 28 Nëntorin – Festën e Flamurit.
Aktivitetet do të zhvillohen nga 23 deri më 28 nëntor, duke përfshirë shfaqje teatrale, programe festive, panaire tradicionale, homazhe, ekspozita dhe koncerte.
Më 23, 24 dhe 25 nëntor, nga ora 12:00, në Teatrin e Qytetit do të jepet shfaqja për fëmijë “Gjinkallat dhe Milingonat”, ndërsa më 25 nëntor, në orën 16:00, Gjimnazi “Zenel Hajdini” do të prezantojë programin festiv kushtuar 28 Nëntorit.
Më 27 dhe 28 nëntor, nga ora 10:00, në sheshin “Rexhep Mala e Nuhi Berisha” do të mbahet panairi tradicional “Forco Traditën”, i organizuar nga Drejtoria e Zhvillimit Ekonomik dhe AZHR.
Aktivitetet qendrore do të zhvillohen më 28 nëntor, duke filluar në orën 09:00 me homazhe në Kompleksin e Varrezave të Dëshmorëve në Gjilan.
Në orën 11:00 do të mbahet aktiviteti letrar “Nëntori në Vargje dhe Rrëfime – Libri, Fjala dhe Atdheu Ynë!”, organizuar nga Biblioteka “Fan S. Noli” dhe Lidhja e Shkrimtarëve.
Në orën 12:00 është paraparë inaugurimi i stemës monumentale të UÇK-së, te rrethi pranë FSK-së.
Programi do të përmbyllet në orën 18:00 me ekspozitën personale të piktorit Qamil Llapashtica në Galerinë e Arteve dhe koncertin festiv të Ansamblit të Këngëve dhe Valleve “Gjilani”, në Teatrin e Qytetit.
Komuna e Gjilanit fton të gjithë qytetarët që të bëhen pjesë e këtyre aktiviteteve dhe së bashku të shënojmë një nga datat më të rëndësishme të historisë sonë kombëtare.