Drejtor: Bajram Isufi
Email: bajram.isufi@rks-gov.net
Tel/ 044 132 288
BIOGRAFIA
Bajram Isufi u lind më 26 janar 1966 në Zhegër të Gjilanit, ku kreu shkollën fillore dhe dy vite të shkollës së mesem për të vazhduar dy vite tjera në Gjilan në drejtimin e teknologjisë kimike. Aktualisht ushtron funksionin e Drejtorit të Drejtorisë për Bujqësi dhe Pylltari në Komunën e Gjilanit, mandat të cilin e ka ushtruar edhe gjatë periudhës 2021–2025.
Ai ka përgatitje të lartë akademike, me studime në fushën e Inxhinierisë së Teknologjisë Kimike nga Universiteti i Mitrovicës, si dhe master në Menaxhment të Përgjithshëm Ndërkombëtar nga Kolegji i Menaxhmentit Ndërkombëtar “Globus”. Gjatë karrierës së tij profesionale, z. Isufi ka mbajtur një sërë pozitash drejtuese në sektorin publik dhe privat, duke përfshirë funksionet e drejtorit, menaxherit, kryeshefit ekzekutiv dhe këshilltarit për zhvillim e menaxhim projektesh.
Ndër angazhimet e tij më të rëndësishme veçohen pozitat si Drejtor në NTP “Dritakos”, Kryeshef Ekzekutiv në KRM “Higjiena” dhe KRM “Ekohigjiena”, si dhe angazhimet menaxheriale në NTSH “Leo Wash & Go” dhe në NSH “Consulting For Development”, ku ka ofruar këshilla biznesore dhe ka udhëhequr procese të menaxhimit të projekteve.
Përvoja e tij shumëvjeçare përfshin fusha të rëndësishme si menaxhimi i mbeturinave, trajtimi i ujërave, mjedisi, hortikultura, zhvillimi biznesor dhe menaxhimi institucional. Përveç angazhimeve profesionale, ai ka kontribuar edhe në jetën shoqërore, sportive dhe publike, përmes roleve udhëheqëse në organizata dhe federata, përfshirë detyrën e nënkryetarit të Shoqatës “Pamkos”, pozitën e kryetarit të KH “Zhegra”, si dhe angazhimin si anëtar i Bordit të Federatës së Hendbollit të Kosovës.
Po ashtu, në kuadër të angazhimit të tij politik dhe publik, në dy palë zgjedhje lokale ka fituar mandatin e këshilltarit komunal, përkatësisht në zgjedhjet e vitit 2021 dhe në zgjedhjet e vitit 2025.
Këto përgjegjësi dëshmojnë përvojën e tij të gjerë në udhëheqje, organizim dhe përfaqësim institucional. Z. Isufi ka ndjekur trajnime dhe programe të ndryshme profesionale të mbështetura nga organizata vendore dhe ndërkombëtare, si GIZ, USAID, Oda Ekonomike e Kosovës dhe Austrian Chamber of Commerce WIFI, në fusha si menaxhimi i cilësisë, menaxhimi i konflikteve, burimet njerëzore, marketingu internacional dhe menaxhimi i projekteve.
Me përvojën e fituar ndër vite, ai sjell në detyrën e tij përkushtim institucional, kompetencë profesionale dhe një qasje bashkëpunuese në shërbim të zhvillimit të bujqësisë dhe pylltarisë. Z. Bajram Isufi është i martuar dhe baba i dy fëmijëve.
Fushëveprimtaria e Drejtorisë:
Në bashkëpunim me Ministrinë e Bujqësisë, Pylltarisë dhe institucionet tjera relevante ushtron përgjegjësitë që ka Komuna në lëmin e bujqësisë, pylltarisë, resurseve natyrore dhe zhvillimit rural.
Përcjell dhe koordinon zbatimin e ligjeve në lëmin e bujqësisë duke përfshirë prodhimtarinë bimore, blegtorale, resurset natyrore, dhe zhvillimin rural në territorin e komunës.
Nxit dhe inkurajon fermerët për të investuar në rritjen e kapacitete të tyre bujqësore.
Organizon seminare, këshillime me qellim të formimit profesional të fermerëve.
Organizon vizita studimore për fermerë brenda dhe jashtë vendit për këmbimin e përvojave të tyre.
Merr masa për vetëdijesimin e institucioneve relevante për rendësinë që ka bujqësia për zhvillimin ekonomik, rritjen e punësimit, zvogëlimin e problemeve sociale; sigurimin e ushqimit të mjaftueshëm, të freskët dhe cilësor, sigurimin e lëndëve të para për zhvillimin e industrisë ushqimore, për përmirësimin e bilancit tregtar si dhe mënyrën se si duhet qasur asaj.
Mban evidencë për tokat bujqësore, llojet dhe sipërfaqet me kultura bujqësore, llojet, kategoritë dhe numrin e krerëve të kafshëve shtëpiake, shoqëritë e bletëve etj.
Analizon potencialin e fermerëve, nevojat dhe mundësitë e zhvillimit të mëtejmë të tyre, rekomandon masat adekuate dhe hulumton mundësitë për mbështetje profesionale, administrative dhe materiale.
Hulumton mundësitë për sigurimin e tregut për tërë prodhimtarinë bujqësore.
Përkujdeset që toka bujqësore të shfrytëzohet për prodhimtari të qëndrueshme bujqësore.
Në rastet e domosdoshme të ndërrimit të destinimit të tokës bujqësore (të përkohshëm ose të përhershëm), cakton taksën e nevojshme në harmoni me ligjin.
Ndërmerr masa për mbrojtjen e prodhimtarisë bujqësore nga fatkeqësitë elementare (vërshimet, breshëri, zjarri, pandemitë etj)
Në rast fatkeqësie elementare, bënë vlerësimin e dëmit dhe propozon rekomandime për masat e mëtejme.
Rregullon mbarështimin e qeneve endacakë, aktivitetet rreth zhdukjes së insekteve të dëmshme, sëmundjeve të bimëve, kafshëve si dhe organizimin e gjuetisë në territorin e komunës.
Koordinon dhe bashkëvepron me OJQ dhe kooperativa që zhvillojnë aktivitet bujqësor.
Bën projekte dhe hulumton donator për realizimin e tyre
Në bashkëpunim me drejtorinë e Inspekcionit bënë mbrojtjen e tokave bujqësore, pyjeve si dhe resurset e tjera natyre, shëndetit të kafshëve etj.
Kujdeset për zhvillimin e turizmit rural.
Kryen edhe punë të tjera nga kompetencat e komunës në lëmin e bujqësisë, pylltarisë dhe resurseve natyrore.
