Kryetari i Komunës së Gjilanit, Alban Hyseni, së bashku me ekipin e tij, ka zhvilluar një takim me rektoren e Universitetit Publik “Kadri Zeka”, Fitore Malaj, dhe përfaqësues të tjerë të udhëheqjes së Universitetit, me fokus në thellimin e bashkëpunimit institucional.
Kryetari Hyseni e uroi rektoren Malaj për marrjen e detyrës së re, duke shprehur gatishmërinë e Komunës për të avancuar bashkëpunimin në fushën e arsimit dhe zhvillimit institucional.
Një ndër temat kryesore ishte ndërtimi i kampusit të ri të Universitetit “Kadri Zeka”, përfshirë përcaktimin e lokacionit, planifikimin e projektit dhe mundësitë e financimit. U diskutua gjithashtu për ruajtjen dhe restaurimin e objektit aktual të Universitetit, si pjesë e rëndësishme e historisë arsimore të Gjilanit.
Në takim u trajtuan edhe mundësitë e bashkëpunimit në hulumtimin shkencor, praktikat profesionale, zhvillimin e mësimdhënësve dhe përfshirjen e studentëve në projekte konkrete, përfshirë mundësitë për praktika të paguara.
Komuna e Gjilanit dhe Universiteti “Kadri Zeka” riafirmuan gatishmërinë për të realizuar nisma të përbashkëta që kontribuojnë në zhvillimin e arsimit, avancimin e Universitetit dhe krijimin e mundësive të reja për studentët dhe qytetarët.
