Drejtori për Zhvillim Ekonomik, Haki Huruglica, ka vizituar fabrikën thuajse të vetme në Kosovë e cila merret me flexoprintim Flexograf në Velekincë.
Për punën, investimet, mbulimin e tregut vendës dhe eskportet në vende të shumta e ka njoftuar Samet Mustafa.
“Flexografi, përfaqëson një nga ndërmarrjet prodhuese të rëndësishme në fushën e shtypjes fleksografike dhe paketimit fleksibil. Gjatë vizitës, patëm mundësinë të njihemi nga afër me procesin e prodhimit, teknologjinë bashkëkohore që përdoret dhe standardet e larta të cilësisë që kjo kompani aplikon në çdo produkt”, tha Huruglica.
Drejtori për Zhvillim Ekonomik, theksoi se veprimtaria e saj përfshin prodhimin e etiketave, paketimeve plastike dhe qeseve për industri të ndryshme, duke iu përgjigjur kërkesave të tregut me profesionalizëm dhe efikasitet.
Ai është informuar se aktualisht, kjo kompani ka mbi 80 punëtorë dhe veçohet për angazhimin e saj në zhvillimin e kuadrove të reja profesionale, duke i pranuar të rinjtë në punë dhe duke i trajnuar ata deri në nivel profesional në këtë fushë.
Drejtori për Zhvillim Ekonomik, shtoi se ky përkushtim jo vetëm që rrit cilësinë e punës, por kontribuon edhe në zhvillimin ekonomik lokal dhe në krijimin e vendeve të reja të punës.
“Vizita në këtë kompani dëshmoi rëndësinë e mbështetjes së prodhuesve vendorë dhe forcimit të kapaciteteve të tyre për të rritur konkurrueshmërinë në treg”, tha drejtori Haki Huruglica.
