Komitetit për Barazi Gjinore i kryesuar nga Xhylishene Berisha së bashku me anëtarët e këtij komiteti dhe me zyrtaren për barazi gjinore, pas mbledhjes së rregullt të komitetit, kanë vizituar edhe repartin e gjinekologjisë në Spitalin Regjional të Gjilanit. Atje nga afër janë njoftuar me statistikat e ndryshme të lindjeve, pastaj tretmanit të lehonave, përkujdesjes për fëmijët e posalindur, gjendjen shëndetësosore, materiale dhe emocionale të nënave, si dhe për dallimet ose jo, që ndodhin nga familja apo prindërit, kur lind djali apo vajza.
Kështu kryesuesja Berisha, është interesuar në emër të të gjithë anëtarëve kryesisht për femrën në përgjithësi në këtë repart, si dhe kushtet të cilat ofrohen për lehonat gjatë shtatzanisë, gjatë trajtimit, gjatë lindjes dhe pas lindjes së bebes.
“Jemi sot këtu në një repart i cili duhet ta ketë vëmendjen, trajtimin dhe përkushtimin maksimal të të gjithë shoqërisë. Kushtet, stafi dhe gjithçka tjetër në këtë repart duhet të jenë në nivelin më të lart të mundshëm, megjithse shihet që gjithçka është në rregull falë edhe stafit. Këtu po shohim një pozitivitet dhe avancim të të gjithëve bashkërisht, si të shoqërisë, poashtu edhe të të gjithë stafit mjekësor. Sot është një fat i mirë që kam takuar edhe nënat lehona por edhe meshkuj të cilët pothuajse brengën kryesore kanë shëndetin e fëmijëve dhe zhvillimin e tyre, e jo sikur vite më parë kur interesimi i parë në një masë të madhe ishte tek gjinia e fëmijës. Urojmë që ligjet e këtij vendi të zbatohen dhe djali e vajza të jenë vërtetë aty ku duhet dhe në raporte të barabarta në të gjitha fushat”, ka thënë ajo.
Stafi mjekësor, ka dhënë informacionet e përgjithshme lidhur me statistikat në përgjithësi, trended që ishin ndërvite, sa i përket lindjeve të reja, që sipas tyre ky numër është gjithnjë e në rënie.
Ata thanë se nëse krahasohet me së paku 15 vjet më parë kur brenda vitit ishin mbi 5 mijë lindje, ky numër tani ka rënë në afër 1500 lindje, por gjithnjë duke llogaritur që sot lindjet po kryhen edhe në klinika private, mirëpo, mesatarja e përgjithshme e fëmijëve në familje sot është rreth 3 fëmijë, për dallim nga vitet më të hershme kur ishte mesatarja 4, 5 apo gjashtë fëmijë.
Komiteti është interesuar gjithashtu edhe për aborted selektive, për të cilat u pohua se nuk kryhen asnjëherë në këtë spital dhe në këtë repart, sikur që kanë bërë thirrje stafi mjekësor dhe ai komunal, që të ketë një mbështetje edhe më të madhe në vetëdijesimin e shoqërisë që të kemi nivelin zero të dominimit, sa i përket dallimeve gjinore.
“Burrat dhe gratë, femrat dhe meshkujt, janë pjesë e pandashme e shoqërisë, dhe duhet që edhe detyrat dhe përgjegjësit, por edhe të drejtat të jenë të barabarta për të gjithë njësoj”, ky ishte qëndrimi i përbashkët, duke përfunduar vizitën në këtë institucion me shumë rëndësi.
