Lidhur me pamjet e publikuara në rrjetin social “JOQ Kosova” për gjendjen e disa hapësirave dhe inventarit në ShFMU “Selami Hallaçi” në Gjilan, për hir të informimit të drejtë të opinionit publik dhe komunitetit të shkollës, sqarojmë se ato paraqesin vetëm pjesë të caktuara të objektit dhe nuk pasqyrojnë gjendjen e përgjithshme të shkollës.
Që nga viti 2023, në këtë institucion arsimor janë realizuar investime të vazhdueshme për përmirësimin e kushteve për nxënësit dhe stafin, përfshirë:
- renovimin e tërësishëm të nyjeve sanitare dhe banjove;
- renovimin e dhomave mësimore;
- krijimin e kabineteve për shkencat e natyrës;
- vendosjen e perdeve në dhomat mësimore;
- krijimin e sallës së përbashkët për stafin mësimor;
- sigurimin e pajisjeve dhe kaldajës së re;
- ndërrimin e tërësishëm të sistemit të ndriçimit;
- investime të tjera në përmirësimin e hapësirave dhe kushteve të mësimit.
Në kuadër të investimeve për këtë vit shkollor, gjatë ditës së sotme ShFMU “Selami Hallaçi” është furnizuar edhe me 142 banka dhe karrige individuale për nxënësit, të cilat do të vendosen në klasat I dhe IX, në përputhje me nevojat e evidentuara.
Institucionet përgjegjëse mbeten të përkushtuara për mirëmbajtjen dhe përmirësimin e vazhdueshëm të kushteve në shkollë, duke i trajtuar me prioritet nevojat e nxënësve dhe stafit.
Njëkohësisht, ruajtja e inventarit dhe pronës publike është përgjegjësi e përbashkët e të gjithë komunitetit shkollor, pasi kjo pronë është në shërbim të drejtpërdrejtë të nxënësve dhe procesit mësimor.
Përmes investimeve të vazhdueshme dhe bashkëpunimit me komunitetin e shkollës, synojmë të krijojmë kushte sa më të mira, të sigurta dhe bashkëkohore për zhvillimin e procesit mësimor.
