Drejtoria për Shëndetësi dhe Mirëqenie Sociale, ka përmbyllur me sukses procesin e thirrjes publike për subvencionimin e projekteve në fushën e shëndetësisë dhe mirëqenies sociale, duke nënshkruar kontratat me 14 organizatat joqeveritare përfituese.
Drejtoresha Mimoza Kadriu Qerimi, tha se qëllimi i kësaj thirrjeje ishte mbështetja financiare e projekteve dhe programeve që kontribuojnë në përmirësimin e shëndetit dhe mirëqenies sociale të qytetarëve.
Sipas saj kjo bëhet përmes ofrimit të shërbimeve sociale, promovimit të shëndetit, mbështetjes së grupeve në nevojë, fuqizimit të përfshirjes sociale dhe zhvillimit të iniciativave me interes publik.
“Në këtë mënyrë, synohet forcimi i partneritetit ndërmjet institucioneve publike dhe organizatave të shoqërisë civile për t’iu përgjigjur sa më mirë nevojave të komunitetit”, tha Kadriu Qerimi.
Drejtoresha për Shëndetësi dhe Mirëqenie Sociale theksoi se përmes kësaj skeme janë ndarë 70 mijë euro, krahasuar me 20 mijë euro sa ishte buxheti në fillim të mandatit.
“Kjo rritje e konsiderueshme dëshmon përkushtimin e Komunës së Gjilanit dhe të Drejtoratit të Shëndetësisë dhe Mirëqenies Sociale, për të investuar në projekte që sjellin ndikim të drejtpërdrejtë në jetën e qytetarëve”, tha Mimoza Kadriu.
Ajo uroi të gjitha organizatat përfituese për suksesin dhe besojnë se projektet e tyre do të realizohen me përgjegjësi, transparencë dhe rezultate konkrete në shërbim të qytetarëve të Komunës së Gjilanit.
