Në Vali Ranch Resort në Gjilan u mbajt sot “Anamorava Economic Forum 2026 – Kapitali i diasporës, potenciali i Anamoravës”, i cili bashkoi përfaqësues të institucioneve, bizneseve, akademisë dhe diasporës për të diskutuar mundësitë e investimeve dhe zhvillimit ekonomik të rajonit.
Në forum morën pjesë zëvendësministri i Industrisë, Ndërmarrësisë dhe Tregtisë, Jeton Mehmeti, nënkryetari i Komunës së Gjilanit, Arianit Sadiku, kryetari i Odës Ekonomike të Kosovës, Lulzim Rafuna, rektorja e Universitetit Publik “Kadri Zeka”, Fitore Malaj, kryetari i Komunës së Kamenicës, Kadri Rahimaj, kryetari i Komunës së Vitisë, Sokol Haliti, si dhe përfaqësues të tjerë institucionalë e të komunitetit të biznesit.
Diskutimet u përqendruan në potencialin ekonomik të komunave të Anamoravës, resurset lokale, avantazhet konkurruese dhe projektet që ofrojnë mundësi për investime. Vëmendje e veçantë iu kushtua rolit të diasporës si partner strategjik në zhvillim, përmes kapitalit, përvojës profesionale dhe lidhjeve me tregjet ndërkombëtare, si dhe kontributit të universitetit në inovacion dhe zhvillimin e kapitalit njerëzor.
Në kuadër të forumit u zhvilluan takime B2B ndërmjet bizneseve vendore dhe atyre nga diaspora, duke krijuar hapësirë për kontakte të drejtpërdrejta dhe partneritete të reja.
Përfaqësuesit e komunave pjesëmarrëse prezantuan gjithashtu mundësitë konkrete për bashkëpunim me sektorin privat dhe investitorët e mundshëm.
Forumi u organizua nga Oda Ekonomike e Kosovës, në bashkëpunim me Universitetin Publik “Kadri Zeka”, si dhe me mbështetjen e Caritas Switzerland dhe Qeverisë së Principatës së Lihtenshtajnit.
Komuna e Gjilanit mbetet e përkushtuar në mbështetjen e iniciativave që promovojnë potencialin e saj ekonomik, nxisin investimet dhe krijojnë mundësi të reja punësimi për qytetarët.
