Projekti “Gjilani Riciklon”, në janar të këtij viti ka nisur fazën e dytë të zhvillimit, ndërsa është projekt i Green Art Center – Prishtina, i cili realizohet në bashkëpunim të ngushtë me Komunën e Gjilanit dhe Drejtorinë e Zhvillimit Ekonomik në Gjilan, ndërsa financohet nga Gizi gjerman. “Gjilani Riciklon”, projekt ky që ka nisur fazën e dytë të zhvillimit të tij në lidhje me vetëdijesimin e qytetarëve për rëndësinë e riciklimit të mbeturinave, të martën është bërë edhe me dy bashkëpunëtorë të rinj, të cilët kanë shprehur vullnetin e tyre që të jenë pjesë e projektit.
Qendra grafike “Pika 5A” si dhe studio e reklamave “Pexi”, i janë bashkangjitur projektit “Gjilani Riciklon”, duke u bërë kështu dhurues të mbetjeve recikluese që bizneset e tyre sjellin. Duke e parë të arsyeshme dhe më se të nevojshme një proces të tillë, pronarët e këtyre dy bizneseve private, kanë zgjedhur të bëhen pjesë e fushatës së nisur nga Green Art Center – Prishtina, duke ofruar mbetjet e tyre për kompaninë e riciklimit, mbetje këto që deri më tani kanë shkuar dëm, për shkak të pamundësisë së riciklimit të tyre.
Pronari i qendrës grafike “Pika 5A” në Gjilan Adnan Sllamniku, ka thënë se në çdo qytet të Kosovës ka nevojë për kompani të cilat ofrojnë riciklimin e mbeturinave, pasi që çdo kund funksionojnë biznese mbetjet e të cilave mund të përpunohen.
“Më vjen mirë që në Gjilan më në fund e kemi një mundësi të tillë, pasi që është për tu dhimbsur i gjithë ky material riciklues që qohet dëm duke u hedhur në kosha të plehrave bashkë me çdo lloj mbeturine tjetër”, ka thënë Sllamniku.
Ndërkaq, edhe pronari i studios së reklamave “Pexi” Shpetim Ibrahimi, është shprehur i kënaqur me mundësinë e riciklimit, pasi që edhe biznesi i tij prodhon mjaft materiale ricikluese, të cilat do të ishte shumë më e dobishme për mjedisin që të ricikloheshin.
“I jam bashkangjitur këtij projekti sepse e kam parë të nevojshme që kështu duhet të veprohet nga secili biznes, pa marrë parasysh veprimtarinë që ushtrohet. Nga çdo biznes ka mundësi të riciklimit, prandaj është shumë e rëndësishme që të vetëdijesohemi dhe këto iniciativa ti përkrahim me vetë dëshirë”, ka thënë Ibrahimi.
Ndryshe, drejtoresha ekzekutive e GAC-it Merlina Beu Mucaj, ka thënë se është për tu përshëndetur vullneti i këtyre dy bizneseve gjilanase për t’iu bashkangjitur projektit “Gjilani Riciklon”.
“Qysh në hapat e parë të ecurisë së projektit në Gjilan kemi parë një gatishmëri të fuqishme të qytetarëve për të bashkëpunuar dhe mbarëvajtja e procesit ka qenë vazhdueshëm e kënaqshme. Na vjen mirë që nismës sonë i janë bashkangjitur edhe dy biznese të kësaj komune, vullneti i të cilëve na bënë të besojmë akoma më shumë në bashkëpunim sa më të gjerë në Gjilan”, ka thënë Beu Mucaj.
